A sa fini de sa cursa de is parìllias su corteu si torrat a cumponi e torrat a sa ruga de Santu Srebistianu. S’est fatu buiu e cun sa sfilada de is cuaddus e de is cavalleris sa cursa finit. Prus de totu su martis, s’ària de festa po sa fini de sa manifestatzioni, non solu de sa dì ma de totu s’annada, si fait intendi dae su pùbblicu e dae totus is partecipantis. S’ària de festa crescit de prus candu is cavalleris giant a sa genti prexada is cocardas pretziosas de is cuaddus. A sa fini de sa sfilada su corteu de is trumbeteris e de is tumborràjus, su grèmiu e is cavalleris andant a sa sedi de su grèmiu in ui s’est fata sa vestitzioni de su Componidori. Candu arribat, su Componidori saludat totus is cavalleris e sa genti e intrat a s’aposentu crocau a susu de su cuaddu. Funt totus scitius candu issu arribat a sa “mesitta” e ci artziat a susu de sa mesa lassendi su cuaddu a s’agiudanti suu. Su sonu de cuntentesa de is trumbas e de is tumborrus, is boxis de prexu e is tzacarradas de manus saludant su Componidori e cumintzat sa svestitzioni. Bogaus su capeddu e su velu, su sonu straordinàriu de is tumborrus annuntziat ca ndi ddi funt boghendi sa màschera: in cussu momentu su Componidori torrat a essi cavalleri e totu su grèmiu, is cavalleris e sa genti andant a ddu saludai e a ddi fai is cumplimentus. Sa festa sighit fintzas a tradu noti.