Sa cursa de is Parìllias si fait in sa ruga de Santu Srebistianu, foras dae s’antiga citadi murada. Difatis, passendi in dae in antis de sa turri de Marianu II, chi est de su ‘200, su corteu cun is cavalleris passat in sa ruga chi in antighidadi ingiriaiat is rugas de difesa de sa citadi medioevali e arribat fintzas a sa turri de Portixedda. A sa fini de sa sfilada, fata in sa ruga de Santu Srebistianu, is cavalleris andant faci a su cammineddu chi finit cun su pòrticu caraterìsticu dae ui partint is parìllias. In custu percursu ant a porri curri totus is parìllias segundu s’òrdini de sa sfilada. In custa ocasioni puru sa presèntzia de is cuaddus e de is cavalleris est annuntziada dae is trumbas e dae is tumborrus. Is Parìllias partint dae “Su Brocci” e andant faci a sa crèsia de Santu Srebistianu. Dae innoi cumintzant is acrobatzias de azardu de is cavalleris chi, a pustis de s’essi preparaus po tantus mesis, sfogant totu s’entusiasmu e mostrant s’abilidadi insoru. Sa prima parìllia est cussa de su Componidori. Issu non fait acrobatzias perigulosas ca tenit un’incàrrigu importanti e non si podit ingolli. Is tres cavalleris faint su passàgiu cun is cuaddus unu a costau de s’àteru, guidaus dae is cavalleris lateralis; inveci su capucursa fait su passàgiu cun is manus a susu de is palas de is cumpàngius. Sighint is parìllias de is àterus cavalleris chi faint acrobatzias perigulosas. In custus ùrtimus annus sa perfetzioni de is parìllias nd’ant fatu unu spetàculu ùnicu. S’ùrtima parìllia est cussa de su Componidori chi serrat sa cursa e fait un’àtera Remada. Custa borta fait su percursu impari cun is cumpàngius suus e, crocau faci a cielu a susu de su cuaddu, saludat e benediscit sa genti cun sa pipia de maju. Su capucursa andat a in ui funt is àterus cavalleris chi ddu saludant cun tzacarradas de manus in su mentris chi issu sighit a benedisci e saludai cun sa pipia de maju.