Is cavalleris funt de seguru una de is componentis principalis de sa Sartìllia. Onni annu su passàgiu de su corteu maestosu, s’elegàntzia de is cuaddus bardaus cun frocus e rasus coloraus e de is cavalleris bestius cun is costùminis de sa traditzioni sarda e ispagnola, faint biri sa circa de richesa e bellesa dae parti de is cavalleris de sa Sartìllia.

Dae unus cantus annus is cavelleris funt 120. In totus is duas dìs ci funt 40 parìllias, cun cussas de is Componidoris, onni una de tres cuaddus. Custu sutzedit sceti dae pagu ca in is primus annus de su noixentus, segundu is fotografias chi teneus, pigaiant parti a sa Sartìllia sceti pagu dexinas de cavalleris. Inveci, dae is annus cincuanta, su nùmeru de is partecipantis est crèsciu e est arribau a centu in is annus otanta. Fintzas a pagus annus fait, pigaiant parti a sa manifestatzioni aristanesa puru cavalleris de àterus comunis: de Abbasanta, Sedilo, Palmas Arborea, Sinnai, Dolianova e de àterus logus de Sardigna in ui ci fiat sa traditzioni de is parìllias. In custus ùrtimus annus podint pigai parti a sa cursa sceti is cavalleris de Aristanis poita est crèscia sa passioni po is cuaddus e is giòvanus de Aristanis bolint pigai parti a sa manifestatzioni. Totus is cavalleris faint riferimentu a sa Sociedadi Isportiva Dilettantistica “Cavalieri Sa Sartiglia”, nàscia in su 1980, chi coordinat agiumai 200 cavalleris e chi onni annu fait is seletzionis po sceberai is 120 cavalleris. 

Is cavalleris si preparant po sa Sartìllia totu s’annu. Difatis, siat chie tenit su cuaddu suu, siat chie ddu depit domandai a un amigu o a unu conoscenti, si depit preparai po tempus meda e s’allenai po essi afiatau cun is àterus cumpàngius de Parìllia. In custus ùrtimus annus sa preparatzioni e su coràgiu de is cavalleris de Aristanis funt arribaus a livellus artus meda. Is acrobatzias, in ui si biri de prus s’afiatamentu e sa preparatzioni de is ses cumponentis, is tres cuaddus e is tres cavalleris, faint biri sa preparatzioni e sa passioni de is Parìllias. Ma, chi in su passàgiu in sa ruga de Santu Srebistianu si birit s’armonia tra is tres cavalleris, in sa cursa in sa ruga de Santa Maria si birit s’abilidadi e sa fortuna de su cavalleri a solu. Difatis is cavalleris chi tenint sa fortuna de essi tzerriaus dae su Componidori po circai de infricì sa stedda, provant onni borta un’emotzioni manna chi at a essi prus forti puru chi su cavalleri arrennescit a pigai sa stedda chi est apicada cun unu nastru birdi a canta a sa Catedrali.