Su dus de friàrgiu est una data importanti po is istitutzionis religiosas de sa citadi. In Aristanis is sòcius de is grèmius, de is cunfrarias e de unus cantus associatzionis religiosas, a mengianu chitzi andant a crèsia in ui, duranti sa missa, benint benedìscidas is candelas. A sa fini de sa missa is sòcius de custas istitutzionis andant a domu de is cunfradis malàdius, de is fiudas e fiudus de is sòcius mortus e de totus is personas chi tenint raportus cun s’associatzioni e ddis giant una candela benedita. Custu gestu est signali de comunioni e solidariedadi manna tra is sòcius e is chi, comenti si siat, tenint cuntatus cun s’associatzioni. Fintzas is cumponentis de is grèmius andant a ddis fai vìsita e ddis giant una candela. In sa pròpria dì, po traditzioni, s’Oberaju Majori de su grèmiu de is massàjus e su Majorale en Cabo de su grèmiu de is maistus de linna, chi funt is autoridadis prus mannas de is duas corporatzionis, nòminant su Componidori de sa Sartìllia insoru. Ddu faint in manera uficiali candu a is cavalleris sceberaus, est a nai a is chi ant a curri sa dumìnica e su martis de coa, ddis giant una candela benedita.

In custus ùrtimus annus sa consegna de sa candela benedita a su Componidori est diventada una festa po sa citadi. Unu muntoni de genti andat a biri sa cerimònia e totus is sòcius de su grèmiu, acumpangiaus dae is tumborràjus e dae is trumbeteris, andant a domu de su cavalleri sceberau. Sa nòmina de su Componidori de su Grèmiu de is massàjus est fata candu s’Oberaju majori giat a su Componidori una candela cun frocus arrùbius e si fait sa pregadoria «Santu Giuanni t’agiudit» a su Santu chi protegit sa corporatzioni. Sa nòmina de su Componidori de su Grèmiu de is maistus de linna est fata candu si fait sa pregadoria «Santu Giuseppi t’assistat» e su Majorale en Cabo ddi giat una candela cun frocus colori de arrosa e celestis. In cussu momentu at a essi giada una candela benedita fintzas a su segundu e a su tertzu cumponi, is cumpàngius de parìllia de is Componidoris. Is drucis saborius de mèndula e sa vernàcia ddos acumpangiant totu sa dì. Is cumponentis de is grèmius, is cavalleris e totus is apassionaus de sa Sartìllia passant totu su merì fadendi festa e giaendi augùrius a is cavalleris chi ant arrìciu s’importanti incàrrigu.